ഹിന്ദു എന്ന എന്റെ പൊസ്റ്റിനു കിട്ടിയ കമന്റുകള്‍ക്കു മറുപടി എഴുതിയപ്പോള്‍ ഒരല്‍പം വലുതായി എന്നാല്‍ പിന്നെ അതൊരു പുതിയ പോസ്റ്റ്‌ ആയി കിടക്കട്ടെ എന്നു ചിന്തിച്ചതിന്റെ ഫലമാണ്‌ ഈ പോസ്റ്റ്‌. ഭൂമി ഉരുണ്ടതാണെന്ന് വേദത്തില്‍ പരാമര്‍ശമുണ്ട്‌ എന്ന് പറഞ്ഞതാണ്‌ എല്ലാവര്‍ക്കും വളരെ ബുദ്ധിമുട്ടായി തോന്നിയത്‌ എന്ന് നിങ്ങളുടെ കമന്റുകളില്‍ നിന്നും വ്യക്തമാകുന്നു.ദയവുചെയ്ത്‌ എന്റെ വിശദീകരണം വായിക്കുമല്ലൊ.ഇത്‌ ഒരു കലഹ വിഷയമാക്കാന്‍ എനിക്ക്‌ താല്‍പ്പര്യമില്ല എങ്കിലും എല്ലാവരുടെയും അഭിപ്രായം അറിയാന്‍ ആഗ്രഹമുണ്ട്‌.ദീര്‍ഘതമസ്സ്‌ എന്ന ഋഷി അസ്യവാമീയ സൂക്തത്തില്‍ ഭൂമി ഉരുണ്ടതാണെന്ന് സ്പഷ്ടമാക്കിയിട്ടുണ്ട്‌. വിഷ്ണു പുരാണത്തിലും ജയദേവന്റെ ഗീതാഗോവിന്ദത്തിലും ഭൂമിയെ ഭൂഗോളം എന്നു തന്നെയാണ്‌ വിശേഷിപ്പിച്ചിരിക്കുന്നത്‌.ഭൂമി ഉരുണ്ടതാണെന്ന് മാത്രമല്ല അത്‌ സൂര്യനെ പ്രദിക്ഷിണം ചെയ്യുന്നു എന്നും വേദങ്ങളിലുണ്ട്‌ "അയം ഗൗ പ്രുശനിരക്രമീദസദന്മാതരം പുരഃ " എന്ന് യജുര്‍വേദത്തില്‍(3-6) പറയുന്നു.ഈ ഭൂഗോളം ജലത്തോടു കൂടി സൂര്യനു ചുറ്റും കറങ്ങിക്കൊണ്ടിരിക്കുന്നു എന്ന് ഇതിന്‌ അര്‍ഥം പറയുന്നു.ഐയ്തരേയ ബ്രാഹ്മണത്തില്‍ "ഭപഞ്ജര സ്ഥിരോ ഭൂരേ വാവ്ര്യുത്യാ ക്ര്യുത്യാ, പ്രതിദൈവസികവ്‌ ഉദയാസ്തമയന സമ്പാദയതി ഗ്രഹ നക്ഷത്രാണാമ" എന്നു പറയുന്നു. അതായത്‌ സൂര്യന്‍ ഒരിക്കലും ഉദിക്കുന്നോ അസ്തമിക്കുന്നോ ഇല്ല .സൂര്യസ്തമനം എന്നത്‌ ഭൂമി എതിര്‍ ദിശയിലേക്ക്‌ തിരിയലാണ്‌ അത്‌ മറിച്ചു വരുന്നത്‌ ഉദയം.മഗല്ലനെ കുറിച്ച്‌ സുഹ്രുത്ത്‌ ഭയഭക്തി ബഹുമാനത്തോടെ എഴുതിയത്‌ വായിച്ചു എനിക്ക്‌ അല്‍ഭുതമില്ല അന്യനാട്ടുകാരനു മാത്രമേ വിവരമുള്ളൂ എന്ന ഭാരതീയന്റെ കോം പ്ലെക്സ്‌.അങ്ങേ വീട്ടിലെ അമ്മയുടെ ഒക്കത്തിരുന്നാലല്ലെ സ്വന്തം അമ്മയുടെ നേരെ കൊഞ്ഞനം കുത്താന്‍ പറ്റൂ. മഗല്ലനും ആയിരം വര്‍ഷം മുന്‍പു ജീവിച്ചിരുന്ന ആര്യഭട്ടന്‍ ഭൂമി ഉരുണ്ടതാണെന്നും, ഭൂമി സൂര്യനെ പ്രദിക്ഷിണം ചെയ്യുന്നു എന്നും മാത്രമല്ല, സൂര്യ ഗ്രഹണത്തേയും ചന്ദ്രഗ്രഹണത്തെയും കുറിച്ച്‌ ഇന്ന് ആധുനിക ശാസ്ത്രം പറയുന്ന അതേ വിവരണങ്ങള്‍ തന്റെ ആര്യഭടീയം എന്ന ഗ്രന്ഥത്തില്‍ പറഞ്ഞിരിക്കുന്നു. അദ്ദേഹം ഭരതീയനാണല്ലൊ അതു കൊണ്ട്‌ നമ്മള്‍ അതെവിടെയും പറയില്ല മഗല്ലനും പൈതഗോറസ്സും കോപ്പര്‍നിക്കസ്സും നീണാള്‍ വാഴട്ടെ. സായിപ്പിന്റെ വിസര്‍ജ്യത്തോളം വരുമോ നമ്മുടെ പ്രചീന ഗ്രന്ഥങ്ങള്‍ അല്ലെ?ഞാന്‍ വേദം പടിച്ചിട്ടുള്ള ആളല്ല. സംസ്കൃതവും പടിച്ചിട്ടില്ല ഇഗ്ലീഷിലും മലയാളത്തിലുമുള്ള ചില വിവര്‍ത്തനങ്ങളും, വിവരമുള്ളവര്‍ എഴുതിയിട്ടുള്ള ചില പുസ്തകങ്ങളും അല്‍പസ്വല്‍പം മറിച്ചു നോക്കിയിട്ടുണ്ടെന്നു മാത്രം.ഞാന്‍ അറിഞ്ഞത്‌ താല്‍പര്യമുള്ള മറ്റുള്ളവര്‍ കൂടി അറിഞ്ഞോട്ടെ എന്ന സദുദ്ദേശം മാത്രമേ ഹിന്ദു എന്ന പോസ്റ്റ്‌ ചെയ്യുമ്പോള്‍ ഉണ്ടായിട്ടുള്ളൂ. ഞാന്‍ ഒരു ഫണ്ടമെന്റലിസ്റ്റ്‌ അല്ല. ഒരു മനുഷ്യനുമായി പരിചയപ്പെടുകയോ അടുക്കുകയോ ഇടപഴകുകയോ ചെയ്യുമ്പോള്‍ അയാളുടെ മതത്തെകുറിച്ച്‌ ഒരിക്കലും ഞാന്‍ ചിന്തിക്കാറോ അന്വേഷിക്കാറോ ഇല്ല.ഒരു മതവിശ്വാസത്തേയും മതപരമായ ചടങ്ങുകളെയും ഇതുവരെ മനസ്സില്‍ പോലും പരിഹസിച്ചിട്ടില്ല.ഇതോ എന്റെ മറ്റേതെങ്കിലും പോസ്റ്റുകളോ ആരെയെങ്കിലും വേദനിപ്പിച്ചിട്ടുണ്ടെങ്കില്‍ ഞാന്‍ പൂര്‍ണമനസ്സോടെ ക്ഷമ ചോദിക്കുന്നു.വര്‍ണ വ്യവസ്ഥയെക്കുറിച്ചുള്ള നിങ്ങളുടെ കമന്റിലെ പരാമര്‍ശത്തോട്‌ ഞാനും യോജിക്കുന്നു.പക്ഷെ അത്‌ ആ വ്യവസ്ഥയുടെ തകരാറായിരുന്നില്ല അതിന്റെ ഇമ്പ്ലിമെന്റെഷനില്‍ വന്ന തകരാറല്ലെ? ജന്മം കൊണ്ടല്ല കര്‍മ്മം കൊണ്ടായിരുന്നു ജാതി നിശ്ചയിച്ചിരുന്നത്‌ എന്നു വച്ചാല്‍ ഒരു ശൂദ്രന്‌ കര്‍മ്മ ഗുണത്താല്‍ ബ്രഹ്മണനാകാന്‍ കഴിയുമായിരുന്നു.അതു പിന്നീട്‌ അധികാരംകിട്ടിയ ചിലര്‍ തങ്ങളുടെ സൗഭാഗ്യങ്ങള്‍ നഷ്ടപ്പെടാതിരിക്കുവാന്‍ മാറ്റിമറിച്ചതല്ലെ. അധികാരം മനുഷ്യനെ എത്രമാത്രം ധുഷിപ്പിക്കുമെന്നതിന്‌ നമുക്കുചുറ്റും ഇക്കാലത്തുപോലും എത്ര ഉദാഹരണങ്ങളുണ്ട്‌.പിന്നെ വര്‍ണ വ്യവസ്ഥ്‌ എന്താ ഇന്നും നിലനില്‍കുന്നില്ലേ? മാനേജര്‍ വരുമ്പോഴേക്കും ഡ്രൈവര്‍ ഓടി വന്ന് ഡോര്‍ തുറക്കുന്നില്ലേ, കാവല്‍ക്കാരന്‍ സലുട്ട്‌ അടിക്കുന്നില്ലേ പ്യൂണ്‍ ഓടി പ്പോയി ചായ കൊണ്ടുവന്ന് മേശപ്പുറത്ത്‌ വെച്ച്‌ ഓച്ചാനിച്ചു നില്‍കുന്നില്ലെ? അവര്‍ ഒന്നിച്ചു ഒരേ വണ്ടിയിലാണോ യാത്ര ചെയ്യുന്നത്‌?ഒരേ സുഖ സൗകര്യങ്ങളാണോ അനുഭവിക്കുന്നത്‌? അപ്പോള്‍ ഇന്നും കര്‍മ്മം അഥവാ ജോലിക്കനുസരിച്ചു തന്നെയാണ്‌ മനുഷ്യന്റെ വര്‍ണം. അപ്പോള്‍ വേദത്തിനു തെറ്റുപറ്റി എന്നു പറയാന്‍ പറ്റുമോ?നിറുത്തുന്നതിനു മുന്‍പു ഞാന്‍ ഒരു ചോദ്യം ചോദിക്കട്ടെ? വിമാനം കണ്ടുപിടിച്ചതും ആദ്യം വിമാനം പറത്തിയതും ആരായിരുന്നു?നിങ്ങളുടെ ഉത്തരം തെറ്റി. ധനുര്‍വേദത്തില്‍ ഭരധ്വജന്‍ വിമാനശാസ്ത്രത്തെ വിവരിക്കുന്നുണ്ട്‌. ഭോജരാജന്‍ വിമാനത്തെ കുറിച്ച്‌ ഗ്രന്ഥമെഴുതിയിട്ടുണ്ട്‌ ഇനി ആധുനിക കാലത്തേക്കു വന്നാല്‍ 1895ല്‍ മഹാരാഷ്ട്രയിലെ പ്രസിദ്ധമായ ജെ.ജെ. സ്കൂള്‍ ഒഫ്‌ ആര്‍ട്ടിലെ അദ്ധ്യാപകനായ ശിവ്‌ കുമാര്‍ ദളപത്‌ എന്നയാള്‍ ചൗപ്പാത്തി കടപ്പുറത്ത്‌ ആദ്യമായി വിമാനം പറത്തി. ബറൊഡരാജാവ്‌ ഗൈക്ക്‌.വാഡ്‌ ജസ്റ്റിസ്‌ മഹാദേവ്‌ റവാദെ എന്നിവരും ആയിരക്കണക്കിനു ജനങ്ങളും അതു കണ്ടു.സ്വാഭാവികമായും അന്നത്തെ ബ്രിട്ടീഷ്‌ സര്‍ക്കാര്‍ അതു തടഞ്ഞു ഒരു അടിമ രാജ്യം ഇത്തരം കണ്ടുപിടുത്തം നടത്തുകയോ?മേലില്‍ ഇത്തരം പരീക്ഷണങ്ങള്‍ നടത്തരുതെന്ന് കര്‍ശനമായി വിലക്കി.സാമ്പത്തികമായും മാനസ്സികമായും തകര്‍ന്ന ശിവ്‌ ബ്രിട്ടീഷ്‌ കാരുടെ ഭീഷണിക്കു വഴങ്ങി ഈ വിമാനം റാലി ബ്രദര്‍സ്‌ കമ്പനിക്ക്‌ വിറ്റു .അങ്ങിനെ 1903ല്‍ റൈറ്റ്‌ സഹോദരന്മാര്‍ വിമാനം പറത്തി. അതിനെ ചരിത്രം കൊണ്ടാടി.ഇനിയും ആര്‍ഷഭാരത സംസ്കാരത്തോട്‌ പുശ്ചവും സായിപ്പു മാത്രമാണ്‌ ശരി എന്നു ധരിക്കുന്നവര്‍ക്കായി ഒരു സായിപ്പിന്റെ വാക്കുകള്‍ ഹിസ്റ്റൊറി ഒഫ്‌ ഇന്ത്യ എന്ന ബുക്കിന്റെ ഒന്നാം വോള്യം1ല്‍ ഡൊ. എന്‍ഫീല്‍ഡ്‌ "ജ്ഞാന സമ്പാദനത്തിനായി പൈതഗോറസ്‌, അലക്സാര്‍ചസ്‌, പൈറൊ എന്നിവരും മറ്റുപലരും ഇന്ത്യ സന്ദര്‍ശിച്ചിരുന്നു. അവരെല്ലാം പിന്നീട്‌ ഗ്രീസ്സിലെ മുഖ്യ തത്ത്വ ജ്ഞാനികളായി"(കടപ്പാട്‌.വേദങ്ങളിലെ ശസ്ത്രദീപ്തി-എം.ആര്‍. രാജേഷ്‌)..
with luv manoj mail 2 me manojputhiyakunnath@yahoo.com
Friday, February 22, 2008
Thursday, February 21, 2008
ഗുരുവായൂരിലെ ചുരിദാറുകള്‍
ഗുരുവായൂരിലെ സമകാലീന വിവാദങ്ങളില്‍ പ്രധാന കഥാപാത്രമണല്ലൊ ചുരിദാര്‍.പണ്ടു കവി പാടിയപോലെ "വേണമോ വേണ്ടയൊ' എന്നാണ്‌ കണ്‍ഫൂഷ്യന്‍.രണ്ടു ദിവസം ഞാന്‍ ഗുരുവായൂര്‍ ആയിരുന്നു ആനയോട്ടം കണ്ടു.അതു കണാനായി പോയതല്ല ആകസ്മികമായി അന്ന് അവിടെ ഉണ്ടായി.കൈ നീട്ടിയാല്‍ തൊടാനാകുന്ന അത്രയും അടുത്തുകൂടെ ആനകള്‍ കുതിച്ചു പായുന്നതു കണ്ടപ്പോള്‍ ശരീരമാകെ കോരിത്തരിച്ചു പോയി (പേടി കൊണ്ടു വിറച്ചു പോയതാണെന്നു വേണമെങ്കില്‍ പറയുകയുമാകാം ഞാന്‍ എതിര്‍ക്കില്ല)ചുരിദാര്‍ അനുവദിച്ചിട്ടുണ്ടെങ്കിലും ആ വേഷത്തില്‍ വന്നവര്‍ വളരെ കുറവ്‌ അതു തന്നെ അധികവും മുപ്പതിനുമുകളില്‍ പ്രായമുള്ളവര്‍. ചെറിയപ്രായക്കാരെല്ലാം പാവാട ,ധാവണി, സാരി തുടങ്ങിയ ട്രഢിഷണല്‍ വസ്ത്രങ്ങളില്‍ ഒതുങ്ങിയപ്പോള്‍. നല്ല പ്രായം കഴിഞ്ഞവരാണ്‌, 'എങ്കില്‍ പിന്നെ കണ്ണനെ ഒന്നു വശീകരിച്ചു കളയാം' എന്നു രണ്ടും കല്‍പിച്ചു തീരുമാനിച്ചത്‌.പറഞ്ഞതിന്റെ കൂട്ടത്തില്‍ ചുരിദാറിന്‌ അനുകൂലമായി ഒരഭിപ്രായം പറഞ്ഞോട്ടെ? പ്രായമുള്ള ആളുകള്‍ പറഞ്ഞു കേട്ടിട്ടുണ്ട്‌ അമ്പലത്തില്‍ കയറുമ്പോള്‍ തറ്റുടുത്തിട്ടേ പണ്ടു പോകാറുണ്ടായിരുന്നുള്ളൂ എന്ന്**for your information * തറ്റുടുക്കുക അല്ലെങ്കില്‍ താറുടുക്കുക എന്നത്‌ കേരള സ്ത്രീകളുടെ ഒരു പരമ്പരാഗത അടിവസ്ത്രമാണ്‌ ഒന്നരയും മുണ്ടും സ്ത്രീ ശരീരത്തിന്‌ പ്രത്യേകിച്ച്‌ ഗര്‍ഭപത്രത്തിനു്‌ വളരെ അധികം സംരക്ഷണം കൊടുക്കുന്ന ഒരു വസ്ത്രമായിരുന്നു പന്ത്രണ്ടും പതിനെട്ടും കുട്ടികളെ പുല്ലുപോലെ പ്രസവിച്ചിട്ടിട്ടും നല്ല ആരോഗ്യത്തോടെ ജീവിക്കാന്‍ പഴയ അമ്മമാര്‍ക്ക്‌ കഴിഞ്ഞതിന്റെ ഒരു കാരണം ഇതാകാം 1/2യില്‍ നിന്ന് 11/2 പോയാല്‍ എന്താണെന്ന് പണ്ട്‌ കണക്കു ക്ലാസ്സുകളില്‍ നിഷ്കളങ്കമായ മുഖഭാവവുമായി പെണ്‍കുട്ടികളോടു ചോദിച്ചിരുന്നത്‌ ഗ്രുഹാതുരത്തോടെ ഓര്‍ക്കുന്നു ( മനസ്സിലായില്ലേ? അരയില്‍ നിന്നും ഒന്നര പോയാല്‍ എന്താണ്‌ എന്ന്). ഇന്ന് പാന്റീസിന്റെയും , ലൈഞ്ചറിയുടെയും, ബികിനിയുടെയും. ത്രെഢിന്റെയുമൊക്കെ തള്ളിക്കയറ്റത്തില്‍ പാവം ഒന്നര അരയില്‍ നിന്നും എന്നെന്നേയ്ക്കുമായി വിട പറഞ്ഞു** അങ്ങിനെയാണെങ്കില്‍ ഏകദേശം തറ്റുടുക്കുന്നതിനു സമാനമായി ഇന്നുള്ള വേഷം ചുരിദാര്‍ തന്നെയാണ്‌.ഈ ഗുരുവായൂരില്‍ വരുമ്പോള്‍ പെണ്ണുങ്ങള്‍ ഇങ്ങിനെ ഒരുങ്ങി വരുന്നതിനു കാരണമെന്താണൊ എന്തോ? പട്ടു സാരിയും സര്‍വാഭരണവിഭൂഷണങ്ങളുമായി അവിടെ നെറ്റിപ്പട്ടം കെട്ടി നില്‍ക്കുന്ന ആനകള്‍ക്കു പോലും അസൂയ തോന്നിപ്പിക്കുന്ന രീതിയിലാണ്‌ മിക്കവരും. കൃഷ്ണാ..... പീതാമ്പരാ...ആശ്രിത വല്‍സലാ....നമിക്കുന്നു
With lots of luv
Manoj manojputhiyakunnath@yahoo.com
With lots of luv
Manoj manojputhiyakunnath@yahoo.com
Friday, February 15, 2008
ഹിന്ദു
ലോകത്തിലെ ഏറ്റവും നല്ല മതം തന്റെ മതമാണെന്നു വിശ്വസിക്കാന്‍ എല്ലാവര്‍ക്കും അവകാശമുണ്ട്‌. അതുപോലെ ഞാനും വിശ്വസിക്കുന്നു.ഹിന്ദുവിന്റെ പ്രമാണഗ്രന്ഥങ്ങളൊന്നും ഒരു പ്രത്യേകം ആള്‍ക്കാര്‍ക്കു മാത്രമായിട്ടുള്ളതല്ല ലോകത്തിനു മുഴുവനും വേണ്ടിയിട്ടുള്ളതാണെന്നതാണു സത്യം.വിശ്വസിക്കാത്തവരെ ഉന്മൂലനം ചെയ്യാന്‍ അഹ്വാനം ചെയ്തിട്ടില്ലാത്ത ഒരു വിശ്വാസപ്രമാണമാണത്‌. "വസുദേവൈക കുടുംബകം" അല്ലെങ്കില്‍ ലോകം മുഴുവന്‍ ഒരു തറവാട്‌ എന്നാണിതിന്റെ ആപ്ത വാക്യം അല്ലാതെ ഇതില്‍ വിശ്വസിക്കുന്നവര്‍ ഒരു കുടുംബവും മറ്റവരെല്ലാം ശത്രുക്കളും എന്നല്ല. "ലോകോ സമസ്തൊ സുഖിനൊ ഭവന്തു:" ലോകത്തിലുള്ള സകലരും സുഖമായിരിക്കട്ടെ എന്നാണ്‌ ആര്‍ഷഭാരതത്തിന്റെ അടിസ്ഥാന തത്വം.നാലു വേദങ്ങളാണ്‌ ഈ വിശ്വാസത്തിന്റെ അടിസ്ഥാനശിലകള്‍. വേദങ്ങളെ ശ്രുതികള്‍ എന്നും വിളിക്കുന്നു വേദങ്ങള്‍ ദൈവത്താല്‍ നിര്‍മിക്കപ്പെട്ടവയാണെന്നു വിശ്വസിക്കപ്പെട്ടു വരുന്നു അതിനാല്‍ അവയെ അപൗരുഷേയങ്ങള്‍ (മനുഷ്യനാല്‍ നിര്‍മിക്കപ്പെട്ടതല്ലാത്ത ത്‌) എന്നും വിശേഷിപ്പിക്കാറുണ്ട്‌എല്ലാ മതങ്ങള്‍ക്കും അതിന്റെതായ ആചരവിധികളുണ്ട്‌ . അത്‌ ഹിന്ദു മതത്തിനും ഉണ്ട്‌. പലരും പറയുന്നതു കേട്ടിട്ടുണ്ട്‌ ഹിന്ദു മതത്തിന്‌ പ്രത്യേക അചാര വിധികളൊന്നുമില്ല എന്ന് അതു ശരിയല്ല ഹിന്ദുക്കള്‍ ആചാരങ്ങളൊന്നും പാലിക്കുന്നില്ല എന്നതാണ്‌ സത്യം. രാവിലെ എഴുന്നേല്‍ക്കുമ്പൊള്‍ തൊട്ട്‌ കുളിക്കുമ്പൊഴും ഭക്ഷണം കഴിക്കുമ്പൊള്‍ വരെ ചൊല്ലാനുള്ള മന്ത്രങ്ങളും ചെയ്യാനുള്ള ആചാരങ്ങളുമുണ്ട്‌ദിവസവും ഭസ്മം ധരിച്ച്‌ രണ്ട്‌ നേരമെങ്കിലും സന്ധ്യാവന്ദനം ചെയ്യണം.മാത്രമല്ല യധാവിധി ഹോമങ്ങള്‍ നടത്തണം പ്രക്ര്യുതിയെയും സകല ചരാചരങ്ങളെയും ദൈവത്തിന്റെ സൃഷ്ടി യായി മനസ്സിലാക്കി പരിചരിക്കുകയും ആദരിക്കുകയും വേണം "ആചാര പരമോ ധര്‍മ" എന്നാണ്‌ വേദങ്ങളില്‍ പറഞ്ഞിരിക്കുന്നത്‌ ആചാരങ്ങള്‍ അനുഷ്ടിക്കാത്ത വിപ്രന്‌ വിദ്യയുടെയൊ സമ്പത്തിന്റെയൊ സല്‍ഫലങ്ങള്‍ അനുഭവിക്കാന്‍ യോഗമുണ്ടാകില്ല എന്നും പറയുന്നു. ഇന്നു കേരളത്തില്‍ ഏറ്റവും നിഷ്ടയോടെ ആചാരങ്ങള്‍ അനുഷ്ടിക്കുന്നവര്‍ ഇസ്ലാം മതവിശ്വാസികളാണെന്നാണ്‌ എനിക്കു തോന്നുന്നത്‌ അതുകൊണ്ടുതന്നെ വരും നാളുകളില്‍ ഏറ്റവും പുരോഗതി ഉണ്ടാകുന്നതും അവര്‍ക്കാകും.കാരണം വേദത്തില്‍ പറഞ്ഞതിനപ്പുറം ഒന്നും നടക്കില്ല എന്നതു തന്നെ. ഭൂമി ഉരുണ്ടതാണെന്ന് വേദത്തില്‍ പരാമര്‍ശമുണ്ട്‌ അതു കഴിഞ്ഞു പതിനായിരക്കണക്കിനു വര്‍ഷങ്ങള്‍ക്കു ശേഷം ഉടലെടുത്ത മതങ്ങളുടെ അടിസ്ഥാന ഗ്രന്ധങ്ങളില്‍ പോലും ഭൂമി പരന്നതായിട്ടാണ്‌ പറഞ്ഞിട്ടുള്ളത്‌.അതുകൊണ്ട്‌ എല്ലാ ഹിനുക്കളും ആചാരങ്ങള്‍ മനസ്സിലാക്കിയെടുക്കാനും അതു ജീവിതത്തില്‍ കൊണ്ടുവരുവാനും ശ്രദ്ധിക്കണം ഹിന്ദുക്കള്‍ മാത്രമല്ല എല്ലാ മതത്തില്‍ വിശ്വസിക്കുന്നവരും സ്വന്തം ആചാരങ്ങള്‍ നന്നായി എല്ലാ ദിവസവും നടത്തണം.നല്ലൊരു ആചാര്യനെ കണ്ടെത്തണംരാഷ്ട്രീയ കാര്യലാഭത്തിനു വേണ്ടി മതത്തെ ദുരുപയോഗം ചെയ്യുന്നവരെ അകറ്റി നിര്‍ത്താനുള്ള ഇച്ചാശക്തി നമുക്കുണ്ടാകേണ്ടിയിരിക്കുന്നു. രാഷ്ട്രീയപ്പാര്‍ട്ടികളുടെ പ്രകടനങ്ങളില്‍ ആര്‍ത്തു വിളിച്ചു നടക്കുന്ന കാഷായ-ഭസ്മ=ജഡാധാരികളെ കണ്ട്‌ തെറ്റിദ്ധരിക്കണ്ട അവരല്ല ഹിന്ദു സന്യാസിമാര്‍.അവര്‍ പറയുന്നതല്ല ഹിന്ദു ധര്‍മം. സന്യാസിമാര്‍ മൂന്നു ദിവസത്തിലധികം ഒരിടത്തു തങ്ങുകയില്ല.ഭിക്ഷാ പാത്രമല്ലാതെ മറ്റൊരു സ്വത്തും അദ്ദേഹത്തിനുണ്ടാകില്ല.ഒരു നേരത്തെ ഭക്ഷണത്തിലുമധികം ഒരു ഉരുള പോലും അദ്ദേഹത്തിന്റെ കയ്യിലുണ്ടാകില്ല.അവര്‍ സ്നേഹത്തെ കുറിച്ചല്ലാതെ സ്പര്‍ദ്ധയെകുറിച്ചു സംസാരിക്കുകയില്ല യധാര്‍ത്ത ഗുരുവിനെ നിങ്ങള്‍ അര്‍ഹിക്കുന്നുണ്ടെങ്കില്‍ ഒരു ദിവസം അദ്ദേഹം നിങ്ങളുടെ വാതിലില്‍ മുട്ടുക തന്നെ ചെയ്യും അതുവരെ കാത്തിരിക്കാം.ഞാനും കാത്തിരിക്കുകയാണ്‌. ഹിന്ദുവോ ക്രിസ്ത്യനോ മുസ്ലീമോ എന്നല്ല നമ്മള്‍ ചെയ്യേണ്ട കാര്യങ്ങള്‍ ചെയ്യുന്നുണ്ടോ എന്നതാണു പ്രധാനം. സ്നേഹത്തോടെ മനോജ്‌
Subscribe to:
Posts (Atom)